لو بتحبينى صحيح
شعر/السيد جلال
ــــــــــــــــــ
لو بتحبينى صحيح
ورينى الجنة معاكى شكلها آيه…
طعمها آيه…
نسينى كل سنين العمر
نسيني وشوش الناس
نسيني إني محار
عارف كل خبايا البحر
نسيني تواريخ أحزاني
عايز اكون مولود
لسه يدوب
بيحس الدنيا لأول مرة
برعم زهرة
بين أحضان النور والخضرة
نسيني إني وحدي
حاسس غربة روحي
مهما بينزف قلبي
أو تئلمني جروحي
نسيني…
عديني البر التاني
لو بتحبيني صحيح
قلبي كان عصفور
محبوس بين جدران الليل والعتمة
والباب مقفول بسلآسل
قدام الباب واقف يتمطع غول
اسمه الخوف
بيكتفني يشل لساني
وعنية رغم العتمة
بتعدي الجدران
والليل وتمد الشوف
فـ تشوف الحلم بعيد
بيشرق،ويغرب،ويقرب….
ويعووووووود
وفـ وسط الليل
صوته يجلجل فـ وداني :
حاول مهما تشوف وتعاني
واوعاك جو الضلمة تتوه
أو تنسى تمارس حق الطيران
لو فـ خيالك
ـــــــــــــــــــــــــــــــــــــــــــــــــــــــــ
التصنيفات : غير مصنف |
